Námskeiðið Aftur í takt er 6 vikna sjálfseflandi námskeið sem styður við endurkomu til vinnu. Rannsóknir sýna að endurkoma til vinnu er háð fjölmörgum þáttum sem fela í sér bæði líkamlega og andlega líðan, félagslega stöðu sem og taugakerfislega virkni (Pereira o.fl., 2020). Mörg þeirra sem eru í starfsendurhæfingu hafa upplifað langvarandi álag, áföll og andlega vanlíðan og eru á þeim stað að taugakerfi þeirra er alls ekki eins stöðugt og sterkt eins og áður. Þar getur áhersla á og fræðsla um ósjálfráða taugakerfið, hvernig við styrkjum það og reynslunám í því verið veigamikill þáttur.

​

Fyrir hverja

Námskeiðið er hugsað, allavega til að byrja með, fyrir karlmenn. Oft myndast annars konar umræður og mörg eru tilbúnari til að opna sig meira um sín mál þegar eingöngu eitt kyn er saman.

Námskeiðið er fyrir fólk sem er búið að vera undir langvarandi álagi og streitu og jafnvel búið að aftengjast sér og komið í örmögnun. Fólk sem vantar leíðir til að endurtengjast sér og ný bjargráð til að takast á við álag og streitu daglegs lífs. Það nýtist einnig þeim sem hafa sögu um áföll og aðra erfiða lífsreynslu sem hefur gert það að verkum að taugakerfið hefur verið útþanið til lengri tíma.

 

Uppbygging námskeiðs og markmið

Námskeiðið byggir á þekkingu úr fimm sálfræðilegum nálgunum sem hafa reynst árangursríkar til að vinna með fólki í starfsendurhæfingu (sjá nánar hér að neðan): „Polyvagal Theory“, „Interpersonal Neurobiology“ „Acceptance and Commitment Therapy (ACT)“, „Compassion Focused Therapy (CFT)“ og atferlisþjálfunar með áherslu á venjur.

 

Námskeiðið er 6 skipti, einu sinni í viku í 2 ½ klst. í senn. Markmið námskeiðsins er að efla þátttöku, seiglu og sjálfstraust með vísindalega studdum aðferðum sem nýtast einstaklingum til að snúa aftur á vinnumarkað. Einnig að fólk öðlist aukna þekkingu á eigin taugakerfi sem dregur úr skömm og sjálfsgagnrýni. Að fólk valdeflist við að læra nýjar leiðir til að takast á við álag og streitu, nái að haldast tengdu sér og bregðast við aðstæðum af aukinni visku og ró. Þannig að fólk upplifi meiri trú á eigin getu, hvílandi í þeirri visku að það kunni leiðir til að styðja við ósjálfráða taugakerfið til að hlúa að aukinni ró, öryggi og tengslum.

​

Uppbygging námskeiðsins er hugsuð þannig að í fyrri hluta hvers tíma er áhersla lögð á fræðslu og umræðu og í seinni hluta tímans á reynslunám, þar sem fólk er leitt í gegnum ýmis konar æfingar og fær því að upplifa aðferðirnar á eigin skinni.

​​

Námskeiðið byggir á sterkum vísindalegum grunni sem styður bæði endurkomu til vinnu og viðhald vinnuþátttöku. Með áherslu í fyrsta lagi á fræðslu um og bjargráð fyrir taugakerfið („polyvagal theory“ og „interpersonal neurobiology“), í öðru lagi á áherslu á sjálfseflingu, samkennd í eigin garð og sálræna seiglu („Compassion Focused Therapy“ og ACT; „Acceptance and Commitmnt Thereapy“)  og í þriðja lagi á „venjubreytingarfræði“ (Atomic Habits), er þátttakendum skapaður raunhæfur og styrkjandi farvegur til að taka aftur virkan þátt í starfi og samfélagi.

​​

​​