Helstu efnisatriði

Markmið námskeiðsins er að undirbúa og valdefla þau sem standa á þeim tímamótum að vera að snúa aftur til vinnu/náms eða eru að nálgast útskrift úr endurhæfingu. Valdeflingin felst í því að auka vitund um styrkleika og bjargráð sem þau búa yfir til að takast á við kvíðavekjandi kveikjur, hindranir og bakslög sem upp geta komið og auka seiglu og álagsþol. Einnig að skerpa á tilgangi vinnunnar og tengja við gildi, jafnvægi og starfsánægju, ásamt því að vinna með raunhæfar væntingar til sín og vinnustaðarins.

Námskeiðið er hugsað sem viðbót eða brú til að tengja saman þau bjargráð sem þátttakendur hafa lært í endurhæfingunni og hugsanlega erfiðleika sem kunna að koma upp samhliða því að snúa aftur til vinnu/náms. Líta má á þennan tíma sem nokkurs konar æfingabúðir, rými til að þjálfa hjálplega færni á þessum t ímamótum.   

​

Nálgunin

Lögð er áhersla á að einstaklingurinn sjálfur hafi skýra sýn og skilning á hverjar hindranir hans eru gagnvart því að snúa aftur til vinnu/náms og hvaða bjargráð geta stutt hann við að yfirstíga þær. Kortlagning vandans út frá HAM nálgun er því lykilatriði í þeim tilgangi að auka innsæi og heildarsýn einstaklingsins sem og að valdefla. Í kortlagningunni eru dregnir fram þættir sem þekkt er að hafi áhrif á ferlið í því að snúa aftur í vinnu/nám;  hindranir (ytri og innri), bjargráð, núvitund, samkennd, gildi, væntingar og skýr markmið.

​

Kennsluform

Á námskeiðinu er fólk leitt í gegnum fjölbreyttar æfingar (reynslunám), auk fræðslu, verkefnavinnu og umræðna.

 

Kennslugögn

Vinnuhefti fylgir með námskeiðinu, auk annarra kennslugagna sem eru send rafrænt til þátttakenda.

​​

Fyrir hverja

Þetta námskeið er hugsað fyrir þau sem:

- eru að nálgast útskrift úr starfsendurhæfingu hjá VIRK

- eru tilbúin að snúa aftur til vinnu/náms.

- hafa sótt þó nokkur námskeið og lært ýmis bjargráð í starfsendurhæfingunni.

- eru tilbúin að tjá sig um lærdóms- og þroskaferlið sem þau hafa  farið í gegnum á meðan á starfsendurhæfingunni stendur 

 

Tími

Námskeiðið eru samtals 17 klukkustundir að lengd. Fyrstu sex skiptin vara í 2 ½ klst. í senn og eru haldin vikulega. Eftirfylgnitími býðst í lokin eftir 2-3 vikur og varir í 2 klst.