Námskeiðið Aftur í takt er 6 vikna sjálfseflandi námskeið sem styður við endurkomu til vinnu. Rannsóknir sýna að endurkoma til vinnu er háð fjölmörgum þáttum sem fela í sér bæði líkamlega og andlega líðan, félagslega stöðu sem og taugakerfislega virkni. Mörg þeirra sem eru í starfsendurhæfingu hafa upplifað langvarandi álag, áföll og andlega vanlíðan og eru á þeim stað að taugakerfi þeirra er alls ekki eins stöðugt og sterkt eins og áður. Þar getur áhersla á og fræðsla um ósjálfráða taugakerfið, hvernig við styrkjum það og reynslunám í því verið veigamikill þáttur.

​​

Fyrir hverja

Námskeiðið er hugsað fyrir karlmenn sem eru búnir að vera undir langvarandi álagi og streitu og jafnvel búnir að aftengjast sér og komnir í örmögnun. Fyrir þá sem vantar að læra leíðir til að endurtengjast sér og ný bjargráð til að takast á við álag og streitu daglegs lífs. Það nýtist einnig þeim sem hafa sögu um áföll og aðra erfiða lífsreynslu sem hefur gert það að verkum að taugakerfið hefur verið útþanið til lengri tíma.

​

Uppbygging námskeiðs og markmið

Námskeiðið byggir á þekkingu úr fimm sálfræðilegum nálgunum sem hafa reynst árangursríkar til að vinna með fólki í starfsendurhæfingu (sjá nánar hér að neðan): „Polyvagal Theory“, „Interpersonal Neurobiology“ „Acceptance and Commitment Therapy (ACT)“, „Compassion Focused Therapy (CFT)“ og atferlisþjálfunar með áherslu á venjur.

 

Námskeiðið er í 6 skipti, einu sinni í viku í 2 ½ klst. í senn. Markmið námskeiðsins er að efla þátttöku, seiglu og sjálfstraust með vísindalega studdum aðferðum sem nýtast einstaklingum til að snúa aftur á vinnumarkað. Einnig að veita þeimt aukna þekkingu á eigin taugakerfi sem dregur úr skömm og sjálfsgagnrýni. Að valdeflast við að læra nýjar leiðir til að takast á við álag og streitu, ná að haldast tengdum sér og bregðast við aðstæðum af aukinni visku og ró. Þannig að þeir upplifi meiri trú á eigin getu, hvílandi í þeirri visku að þeir kunni leiðir til að styðja við ósjálfráða taugakerfið til að hlúa að aukinni ró, öryggi og tengslum.

​​

Uppbygging námskeiðsins er hugsuð þannig að í fyrri hluta hvers tíma er áhersla lögð á fræðslu og umræðu og í seinni hluta tímans á reynslunám, þar sem þátttakendur eru leiddir í gegnum ýmis konar æfingar og upplifir því aðferðirnar á eigin skinni.

​​​

Námskeiðið byggir á sterkum vísindalegum grunni sem styður bæði endurkomu til vinnu og viðhald vinnuþátttöku. Með áherslu í fyrsta lagi á fræðslu um og bjargráð fyrir taugakerfið, í öðru lagi á áherslu á sjálfseflingu, samkennd í eigin garð og sálræna seiglu og í þriðja lagi um að koma nýjum venjum í daglegt líf. Á námskeiðinu er þátttakendum skapaður raunhæfur og styrkjandi farvegur til að taka aftur virkan þátt í starfi og samfélagi.​​

​​​